മഞ്ഞ നിറമുള്ള ആമ വൈറലായി
സാധാരണ ആമകളുടെ നിറം കറുപ്പാണ്. എന്നാല്‍ മഞ്ഞ നിറമുള്ള ആമകളുമുണ്ടെന്ന് ഒഡീഷയിലെ ബാലസോര്‍ ജില്ലയിലെ ജനങ്ങള്‍ പറയും. കഴിഞ്ഞ ദിവസമാണ് മഞ്ഞ നിറത്തിലുള്ള ആമയെ ഇവിടെ നിന്നും കണ്ടെത്തിയത്. വളരെ വിരളമായ കാഴ്ചയാണിതെന്ന് മുതിര്‍ന്ന വനംവകുപ്പ് ഉദ്യോഗസ്ഥര്‍ സാക്ഷ്യപ്പെടുത്തുന്നു.’ആമയുടെ തോടുള്‍പ്പെടെ ശരീരം മുഴുവന്‍ മഞ്ഞനിറമാണ്. ഇത്തരമൊന്നിനെ ഇതിന് മുമ്ബ് ഞാന്‍ കണ്ടിട്ടേയില്ല.’ വനംവകുപ്പ് വാര്‍ഡനായ ഭാനുമിത്ര ആചാര്യ വാര്‍ത്താ ഏജന്‍സിയായ എഎന്‍ഐയോട് പറഞ്ഞു. ബാലസോര്‍ ജില്ലയിലെ സുജാന്‍പൂര്‍ ഗ്രാമത്തില്‍ നിന്നാണ് കഴിഞ്ഞ ദിവസം ഗ്രാമവാസികള്‍ ഈ ആമയെ രക്ഷപ്പെടുത്തിയത്. അപ്പോള്‍ തന്നെ വനംവകുപ്പ് ഉദ്യോഗസ്ഥരെ വിവരമറിയിക്കുകയും ആമയെ അവര്‍ക്ക് കൈമാറുകയും ചെയ്തു.’മിക്കവാറും ആല്‍ബിനോ എന്ന പ്രതിഭാസമായിരിക്കും ഇത്. ഒരു മനുഷ്യന്റെയോ മൃഗത്തിന്റെയോ ത്വക്കിലോ മുടിയിലോ വര്‍ണകത്തിന്റെ കുറവ് മൂലം ഉണ്ടാകുന്ന നിറവ്യത്യാസമാണ് ആല്‍ബിനോ. വര്‍ഷങ്ങള്‍ക്ക് മുമ്ബ് സിന്ധിലെ നാട്ടുകാര്‍ ഇത്തരം ഒരു വ്യതിയാനം കണ്ടെത്തിയിട്ടുണ്ട്.’ ഐഎഫ്‌എസ് ഉദ്യോഗസ്ഥനായ സുശാന്ത നന്ദ ആമയുടെ ചിത്രത്തിനൊപ്പം ട്വിറ്ററില്‍ കുറിച്ചു. ആമ വെള്ളത്തില്‍ നീന്തുന്ന വീഡിയോയും ഇദ്ദേഹം പങ്കുവച്ചിട്ടുണ്ട്. ആമയുടെ കണ്ണുകള്‍ക്ക് പിങ്ക് നിറമാണെന്നും ഈ നിറവ്യത്യാസം ആല്‍ബിനിസത്തിന്റെ ഫലമാണെന്നും അദ്ദേഹം പറഞ്ഞു.