ഖത്തരി പൗരന്മാര്‍ക്കും താമസക്കാര്‍ക്കും ഖത്തറില്‍തന്നെ അവധിയാഘോഷിക്കുന്നതിനുള്ള പാക്കേജുകളുമായി (സ്റ്റേക്കേഷന്‍ പാക്കേജുകള്‍) ഖത്തര്‍ എയര്‍വേസ് ഹോളിഡേയ്സ്
അന്തര്‍ദേശീയ ഹോസ്പിറ്റാലിറ്റി അനുഭവങ്ങള്‍ സ്വദേശത്തുതന്നെ ലഭ്യമാക്കുകയാണ് ലക്ഷ്യമിടുന്നത്. ഖത്തര്‍ ഹോസ്പിറ്റാലിറ്റി മേഖലയെ പിന്തുണക്കുന്നതിനുള്ള നടപടികളുടെ ഭാഗമായാണ് ലോക വിനോദസഞ്ചാര ദിനത്തോടനുബന്ധിച്ച്‌ പുതിയ പാക്കേജുകള്‍ ഖത്തര്‍ എയര്‍വേസ് ഹോളിഡേയ്സ് അവതരിപ്പിച്ചിരിക്കുന്നത്.ദോഹയിലെ അഞ്ച് പ്രമുഖ ഹോട്ടലുകളിലാണ് പാക്കേജുകള്‍ ലഭ്യമാക്കിയിട്ടുള്ളത്. അല്‍ മെസ്സില ലക്ഷ്വറി കലക്ഷന്‍ റിസോര്‍ട്ട് ആന്‍ഡ് സ്പാ, മോണ്‍ട്രിയന്‍ ദോഹ, സൂഖ് വാഖിഫ് ബോട്ടിക്യൂ ഹോട്ടല്‍സ്, ഡബ്ല്യൂ ദോഹ, വെസ്റ്റിന്‍ ദോഹ ഹോട്ടല്‍ ആന്‍ഡ് സ്പാ എന്നീ ഹോട്ടലുകളിലാണ് ഖത്തര്‍ എയര്‍വേസ് ഹോളിഡേയ്സ് പാക്കേജ്.ഒരു രാത്രിക്ക് ഒരാള്‍ക്ക് 385 റിയാല്‍ നിരക്കിലാണ് പാക്കേജുകള്‍ ആരംഭിക്കുന്നത്. ഇതില്‍ േബ്രക്ക് ഫാസ്റ്റ്, ഡിന്നര്‍ ഉള്‍പ്പെടും. ഒക്ടോബര്‍ 15ഓടെ ബുക്ക് ചെയ്ത് ഒക്ടോബര്‍ 31 വരെ പാക്കേജ് ലഭ്യമാകും.കോവിഡ്-19 അന്തര്‍ദേശീയ യാത്രകള്‍ക്ക് പരിധിയിട്ടതിനാല്‍ സ്വദേശികള്‍ക്കും രാജ്യത്തെ താമസക്കാര്‍ക്കുമായി സ്റ്റേ ലോക്കല്‍, ഫീല്‍ ഗ്ലോബല്‍ എന്ന പേരില്‍ പുതിയ സ്റ്റേക്കേഷന്‍ പാക്കേജുകള്‍ അവതരിപ്പിക്കുകയാണെന്ന് ഖത്തര്‍ എയര്‍വേസ് ഗ്രൂപ് സി.ഇ.ഒ അക്ബര്‍ അല്‍ ബാകിര്‍ പറഞ്ഞു. സ്വദേശത്തിരുന്നുതന്നെ അന്താരാഷ്ട്ര അവധിക്കാല അനുഭവമാണ് ഖത്തര്‍ എയര്‍വേസ് മുന്നോട്ടുവെക്കുന്നതെന്നും മികച്ച കാലാവസ്ഥയാണ് രാജ്യത്ത് ആഗതമാകുന്നതെന്നും അല്‍ ബാകിര്‍ വ്യക്തമാക്കി.സ്റ്റേക്കേഷന്‍ പാക്കേജുകള്‍ക്കായി തെരഞ്ഞെടുത്തിരിക്കുന്ന ഹോട്ടലുകളെല്ലാം ഖത്തര്‍ നാഷനല്‍ ടൂറിസം കൗണ്‍സില്‍ അംഗീകാരം ലഭിച്ചവയാണ്. ഖത്തര്‍ പൊതുജനാരോഗ്യ മന്ത്രാലയത്തിെന്‍റ ഖത്തര്‍ ക്ലീന്‍ സംരംഭത്തിലും ഹോട്ടലുകള്‍ പങ്കാളികളായിട്ടുണ്ട്.