മെസിക്ക് മധുരപ്പതിനാറ്
- തുടര്‍ച്ചയായി 16 ചാമ്ബ്യന്‍സ് ലീഗ് സീസണുകളില്‍ ഗോള്‍ നേടുന്ന ആദ്യ താരമായി ലയണല്‍ മെസി
മാഡ്രിഡ് : ചരിത്ര വഴിയിലെ ഒരു നാഴികക്കല്ലുകൂടി പിന്നിട്ട് ബാഴ്സലോണയുടെ ഇതിഹാസതാരം ലയണല്‍ മെസി പുതിയ സീസണ്‍ ചാമ്ബ്യന്‍സ് ലീഗിന് തുടക്കമിട്ടു.കഴിഞ്ഞ രാത്രി ദുര്‍ബലരായ ഹംഗേറിയന്‍ ക്ളബ് ഫെറെന്‍സ്‌വാറോസിനെ ചാമ്ബ്യന്‍സ് ലീഗ് പ്രാഥമിക റൗണ്ടിലെ ആദ്യ മത്സരത്തില്‍ 5-1ന് ബാഴ്സലോണ കീഴടക്കിയപ്പോള്‍ അതില്‍ ആദ്യ ഗോള്‍ മെസിയുടെ വകയായിരുന്നു. ഇതോടെ തുടര്‍ച്ചയായി 16 ചാമ്ബ്യന്‍സ് ലീഗ് സീസണുകളില്‍ ഗോളടിക്കുന്ന ആദ്യ താരമെന്ന റെക്കാഡ് മെസിയുടെ പേരില്‍ കുറിക്കപ്പെട്ടു.
ബാഴ്സലോണയെക്കൂടാതെ ഇറ്റാലിയന്‍ ക്ളബുകളായ യുവന്റസും ലാസിയോയും ഇംഗ്ളീഷ് ക്ളബ് മാഞ്ചസ്റ്റര്‍ യുണൈറ്റഡും കഴിഞ്ഞ സീസണിലെ സെമിഫൈനലിസ്റ്റുകളായി അട്ടിമറി സൃഷ്ടിച്ച ആര്‍.ബി ലെയ്പ്സിഗും ആദ്യ റൗണ്ട് മത്സരത്തില്‍ വിജയം കണ്ടു. യുവന്റസ് എതിരില്ലാത്ത രണ്ടുഗോളുകള്‍ക്ക് ഉക്രേനിയന്‍ ക്ളബ് ഡൈനമോ കീവിനെ കീഴടക്കിയപ്പോള്‍ കഴിഞ്ഞ ഫൈനലിസ്റ്റുകളായ പാരീസ് എസ്.ജിയെ ഒന്നിനെതിരെ രണ്ട് ഗോളുകള്‍ക്കാണ് മാഞ്ചസ്റ്റര്‍ യുണൈറ്റഡ് തോല്‍പ്പിച്ചത്. ലാസിയോ 3-1ന് ബൊറൂഷ്യ ഡോര്‍ട്ട്മുണ്ടിനെ കീഴടക്കിയപ്പോള്‍ ചെല്‍സി സ്പാനിഷ് ക്ളബ് സെവിയ്യയുമായി ഗോള്‍ രഹിത സമനിലയില്‍ പിരിഞ്ഞു. തുര്‍ക്കി ക്ളബ് ഇസ്താംബുള്‍ ബസാക്ക്സെഹിറിനെയാണ് ലെയ്പ്സിഗ് മറുപടിയില്ലാത്ത രണ്ടുഗോളുകള്‍ക്ക് മറികടന്നത്.
സ്വന്തം തട്ടകത്തില്‍ നടന്ന മത്സരത്തില്‍ 27-ാം മിനിട്ടില്‍ തന്നെ വീഴ്ത്തിയതിന് ലഭിച്ച പെനാല്‍റ്റിയിലൂടെയാണ് മെസി ചരിത്രത്തിലേക്ക് ഗോളിച്ചുകയറിയത്. ചാമ്ബ്യന്‍സ് ലീഗിലെ മെസിയുടെ 116-ാമത്തെ ഗോളായിരുന്നു ഇത്. മെസി ഗോള്‍ നേടുന്ന 38-ാമത്തെ യൂറോപ്യന്‍ ക്ളബാണ് ഫെറെന്‍സ്‌വാറോസ്. 25 വര്‍ഷത്തെ ഇടവേളയ്ക്ക് ശേഷമാണ് ഫെറെന്‍സ്‌വാറോസ് ചാമ്ബ്യന്‍സ് ലീഗിലേക്ക് യോഗ്യത നേടിയത്.
യുവതാരം അന്‍സു ഫറ്റി (42-ാം മിനിട്ട്),ഫിലിപ്പ് കുടീഞ്ഞോ (52),പെട്രി(82),ഡെംബെലെ(89) എന്നിവരാണ് ബാഴ്സലോണയ്ക്ക് വേണ്ടി മറ്റുഗോളുകള്‍ നേടിയത്. 70-ാം മിനിട്ടില്‍ ബാഴ്സലോണ ഡിഫന്‍ഡര്‍ ജെറാഡ് പിക്വെ ബോക്സിനുള്ളിലെ ഫൗളിന് നേരിട്ട് ചുവപ്പുകാര്‍ഡ് ഏറ്റുവാങ്ങി പുറത്തേക്കു നടന്നു. ഇതിന് ലഭിച്ച പെനാല്‍റ്റിയാണ് ഖരാറ്റിന്‍ ഹംഗേറിയന്‍ ക്ളബിന്റെ ആശ്വാസഗോളാക്കി മാറ്റിയത്.
ഈ വിജയത്തോടെ ബാഴ്സലോണ ഗ്രൂപ്പ് ജിയില്‍ ഒന്നാം സ്ഥാനത്താണ്. അല്‍വാരോ മൊറാട്ടയുടെ ഇരട്ടഗോളുകള്‍ക്ക് ഡൈനമോ കീവിനെ തോല്‍പ്പിച്ച യുവന്റസാണ് രണ്ടാം സ്ഥാനത്ത്. 46,84 മിനിട്ടുകളിലായിരുന്നു മൊറാട്ടയുടെ ഗോളുകള്‍.
പാരീസിനെതിരായ മത്സരത്തില്‍ സ്വന്തം താരങ്ങള്‍ മൂന്നുഗോളടിച്ചിട്ടും 2-1നായിരുന്നു മാഞ്ചസ്റ്റര്‍ യുണൈറ്റഡിന്റെ വിജയം. പാരീസില്‍ ചെന്ന് 23-ാം മിനിട്ടില്‍ ബ്രൂണോ ഫെര്‍ണാണ്ടസിന്റെ പെനാല്‍റ്റിയിലൂടെ മാഞ്ചസ്റ്റര്‍ മുന്നിലെത്തിയിരുന്നു. എന്നാല്‍ 55-ാം മിനിട്ടില്‍ മാര്‍ക്കസ് റാഷ്ഫോര്‍ഡിന്റെ പിഴവില്‍ സ്വന്തം വലയില്‍ പന്തുപതിച്ചതോടെ കളി സമനിലയിലായി. 87-ാം മിനിട്ടില്‍ അന്തോണി മാര്‍ഷലാണ് വിജയഗോള്‍ നേടിയത്.
മത്സരഫലങ്ങള്‍
ബാഴ്സലോണ 5 – ഫെറെന്‍സ്‌വാറോസ് 1
യുവന്റസ് 2- ഡൈനമോ കീവ് 0
ചെല്‍സി 0- സെവിയ്യ 0
മാന്‍.യുണൈറ്റഡ് 2- പി.എസ്.ജി 1
ലാസിയോ 3 – ഡോര്‍ട്ട്മുണ്ട് 1
ലെയ്പ്സിഗ് 2- ബസാക്ക്സെഹിര്‍ 0
റെന്നെ 1-ക്രാസ്നോദര്‍ 1
ബ്രൂഗെ 2- സെനിത്ത് 1