കര്‍ഷക സമരത്തിലുണ്ടായ സംഘര്‍ഷത്തില്‍ വിട്ടുവീഴ്ചയില്ലാത്ത നടപടികളുമായി ഡല്‍ഹി പൊലീസ്
ന്യൂഡല്‍ഹി: സംഘര്‍ഷത്തിനിടെ മരിച്ച കര്‍ഷകനെതിരെയടക്കം കേസുകള്‍ രജിസ്റ്റര്‍ ചെയ്തിട്ടുണ്ട്. 22 കേസുകളാണ് ഇപ്പോള്‍ രജിസ്റ്റര്‍ ചെയ്തിട്ടുള്ളത്. ഒാരോ സംഘര്‍ഷത്തിലും വെവ്വേറെ കേസുകള്‍ രജിസ്റ്റര്‍ ചെയ്യാനാണ് നീക്കം.സംഘര്‍ഷത്തില്‍ 153 പൊലീസുകാര്‍ക്ക് പരിക്കേറ്റുവെന്ന് പൊലീസ് അറിയിച്ചു. കര്‍ഷകര്‍ 100 കോടിയുടെ നഷ്ടമുണ്ടാക്കിയെന്നും ഡല്‍ഹി െപാലീസ് അവകാശപ്പെടുന്നുണ്ട്.കര്‍ഷക സമരത്തെ തുടര്‍ന്ന് ഏര്‍പ്പെടുത്തിയ പല നിയന്ത്രണങ്ങളും തുടരുകയാണ്. ലാല്‍കില, ജുമ മസ്ജിദ് തുടങ്ങിയ സ്ഥലങ്ങളിലെ മെട്രോ സ്റ്റേഷനുകള്‍ ഇന്നും അടഞ്ഞു കിടക്കും. മൊൈബല്‍ ഇന്‍റര്‍നെറ്റ് സേവനവും തടസപ്പെടും. സിംഘു, തിക്രി, ഗാസിപൂര്‍, മുകാബ്ര ചൗക് എന്നിവിടങ്ങളിലെ ഇന്‍റര്‍നെറ്റ് സേവനമാണ് തടസപ്പെടുക. സംഘര്‍ഷത്തെ തുടര്‍ന്ന് ഈ പ്രദേശങ്ങളിലെ ഇന്‍റര്‍നെറ്റ് സേവനം ചൊവ്വാഴ്ച ഉച്ചയോടെ നിര്‍ത്തിയിരുന്നു. ഇത് തുടരാനാണ് ആഭ്യന്തര സെക്രട്ടറിയുടെ ഉത്തരവ്.ഗാസിപൂര്‍ മണ്ഡി, എന്‍.എച്ച്‌ -9, എന്‍.എച്ച്‌ -24 റോഡുകള്‍ ട്രാഫിക് നിയന്ത്രണത്തിന്‍റെ ഭാഗമായി അടച്ചിട്ടിട്ടുണ്ട്.