ലിവര്‍പൂള്‍ വീണ്ടും വിജയ വഴിയിലേക്ക് തിരികെ എത്തിയിരിക്കുകയാണ്
എഫ് എ കപ്പില്‍ മാഞ്ചസ്റ്റര്‍ യുണൈറ്റഡിനോഡേറ്റ പരാജയം മറന്ന ലിവര്‍പൂള്‍ ഇന്നലെ സ്പര്‍സിനെ തകര്‍ത്തെറിഞ്ഞു. ടോട്ടനത്തിന്റെ ഹോം ഗ്രൗണ്ടില്‍ നടന്ന മത്സരത്തില്‍ ഒന്നിനെതിരെ മൂന്നു ഗോളുകള്‍ക്ക് ആണ് ക്ലോപ്പിന്റെ ടീം വിജയിച്ചത്. ഇത് തുടര്‍ച്ചയായ നാലാം തവണയാണ് ക്ലോപ്പിനു മുന്നില്‍ മൗറീനോ പരാജയപ്പെടുന്നത്.മത്സരം ആരംഭിച്ച്‌ രണ്ടാം മിനുട്ടില്‍ തന്നെ സ്പര്‍സ് സോണിലൂടെ ലീഡ് എടുത്തിരുന്നു. എന്നാല്‍ ആ ഗോളിന്റെ ബില്‍ഡ് അപ്പില്‍ സോണ്‍ ഓഫ് സൈഡ് ആയിരുന്നു എന്ന് വാര്‍ വിധിച്ചു. ഈ അറ്റാക്കിനു ശേഷം കൂടുതലും ലിവര്‍പൂളിന്റെ അറ്റാക്കായിരുന്നു കണ്ടത്. ആദ്യ പകുതിയുടെ ഇഞ്ച്വറി ടൈമില്‍ ആയിരുന്നു ലിവര്‍പൂളിന്റെ വക കളിയിലെ ആദ്യ ഗോള്‍ വന്നത്. മാനെയുടെ പാസില്‍ നിന്ന് ഒരു ടാപിന്നിലൂടെ ഫര്‍മീനീ ലോറിസിനെ കീഴ്പ്പെടുത്തി.രണ്ടാം പകുതിയുടെ തുടക്കത്തില്‍ അര്‍നോള്‍ഡിലൂടെ ലിവര്‍പൂള്‍ രണ്ടാം ഗോളും കണ്ടെത്തി. ഇത്തവണ മാനെയുടെ ഷോട്ടിന്റെ റീബൗണ്ടില്‍ നിന്നായിരുന്നു ഗോള്‍. ഹൊയിബിയേര്‍ഗിലൂടെ ഒരു ഗോള്‍ മടക്കാന്‍ സ്പര്‍സ്സിനായി. കളിയിലെ ഏറ്റവും മികച്ച ഗോള്‍ ഇതായിരുന്നു. എങ്കിലും 65ആം മിനുട്ടില്‍ മാനെയിലൂടെ ലിവര്‍പൂള്‍ മൂന്നാം ഗോളും നേടി മൂന്ന് പോയിന്റ് ഉറപ്പാക്കി. ഈ വിജയത്തോടെ ലിവര്‍പൂള്‍ 37 പോയിന്റുമായി നാലാം സ്ഥാനത്ത് എത്തി. ടോട്ടനം 33 പോയിന്റുമായി ആറാമത് നില്‍ക്കുന്നു.