ഡയാന രാജകുമാരിയുടെ വിവാദ അഭിമുഖം സംഘടിപ്പിച്ച ബ്രിട്ടീഷ് മാധ്യമപ്രവര്‍ത്തകന്‍ മാര്‍ട്ടിന്‍ ബഷീര്‍ ഡയാനയുടെ മക്കളായ വില്യമിനോടും ഹാരിയോടും മാപ്പ് അപേക്ഷിച്ചു
അതെ സമയം താന്‍ നടത്തിയ അഭിമുഖത്തെ ഡയാനയുടെ മരണവുമായി ബന്ധിപ്പിക്കുന്ന അവകാശ വാദങ്ങള്‍ യുക്തിരഹമാണെന്നും അദ്ദേഹം പറഞ്ഞു .തെറ്റായ വിവരങ്ങള്‍ കാണിച്ചാണ് ബഷീര്‍ ഡയാനയെ അഭിമുഖത്തിന് പ്രേരിപ്പിച്ചതെന്ന ആരോപണങ്ങള്‍ ഉയര്‍ന്നിരുന്നു. ഇതേ തുടര്‍ന്ന് നടത്തിയ അന്വേഷണത്തില്‍ വ്യാജ ബാങ്ക് സ്റ്റേറ്റ്മെന്‍റുകള്‍ ഉപയോഗിച്ചുവെന്ന റിപ്പോര്‍ട്ട് വിരമിച്ച മുതിര്‍ന്ന ജഡ്ജായ ജോണ്‍ ഡൈസന്‍ നല്‍കിയിരുന്നു. ഇതിലൂടെ ഡയാനയെ തെറ്റിദ്ധരിപ്പിച്ചുവെന്നും റിപ്പോര്‍ട്ടില്‍ പറയുന്നു .ഡയാനയെ നിരീക്ഷിക്കാന്‍ അടുത്ത സഹായി കള്‍ക്ക് ചിലര്‍ പണം നല്‍കിയെന്ന ബാങ്ക് സ്റ്റേറ്റ്മെന്‍റുകളാണ് വ്യാജമായി നിര്‍മിച്ചത്. ഡയാനയുടെയും സഹോദരന്‍ ചാള്‍സ് സ്പെന്‍സറിന്റെയും വിശ്വാസം ആര്‍ജ്ജിക്കുന്നതിനായി ബഷീര്‍ ഇവ കാണിക്കുകയും ചെയ്തതായി റിപ്പോര്‍ട്ടില്‍ ചൂണ്ടിക്കാട്ടുന്നു .ഇതിനെ തുടര്‍ന്നാണ് ബഷീര്‍ ഇരുവരോടും മാപ്പ് പറഞ്ഞത്.ഡയാനയുടെ മക്കളായ വില്യം രാജകുമാരനോടും ഹാരി രാജകുമാരനോടും മാപ്പ് ചോദിക്കുന്നതായി ബഷീര്‍ പ്രമുഖ അന്തര്‍ ദേശീയ മാധ്യമത്തോട് പറഞ്ഞു. ഡയാനയെ ഒരു തരത്തിലും ദ്രോഹിക്കണമെന്ന് ഞങ്ങള്‍ കരുതിയിരുന്നില്ല, ഞങ്ങള്‍ അങ്ങനെ ചെയ്തുവെന്ന് വിശ്വസിക്കുന്നുമില്ലെന്നും ബഷീര്‍ കൂട്ടിച്ചേര്‍ത്തു .ഡയാനയെ തെറ്റിദ്ധരിപ്പിച്ചാണ് അഭിമുഖത്തില്‍ പങ്കെടുപ്പിച്ചു എന്നതിന് പുറമെ കൊട്ടാരത്തിലെ ജോലിക്കാര്‍ക്ക് ചാരപ്പണി നടത്താന്‍ കൈക്കൂലി കൊടുത്തുവെന്നുമുള്ള ആരോപണങ്ങള്‍ ഉയര്‍ന്നിരുന്നു . ബഷീറിനെതിരെ കുറ്റാരോപണങ്ങള്‍ വന്നിട്ടും ബി.ബി.സി മൗനം പാലിച്ചുവെന്നും വാര്‍ത്തകള്‍ പുറത്ത് വന്നിരുന്നുമാര്‍ട്ടിന്‍ ബഷീറിന്റെ പ്രവൃത്തികളും അഭിമുഖവും മാതാപിതാക്കളുടെ ബന്ധത്തില്‍ വലിയ വിള്ളല്‍ വീഴ്ത്തിയെന്നും ഡയാനക്ക് അവസാന നിമിഷങ്ങളില്‍ ഭയവും വിഷാദവും ഒറ്റപ്പെടലും സമ്മാനിച്ചുവെന്നും വില്യം ആരോപിച്ചിരുന്നു . എന്നാല്‍, ഈ പ്രവര്‍ത്തനങ്ങള്‍ മാതാവിന്റെ മരണത്തില്‍ വലിയ പങ്കുവഹിച്ചുവെന്നായിരുന്നു ഹാരിയുടെ പ്രതികരണം. 1997ല്‍ 36ാം വയസില്‍ പാരീസിലുണ്ടായ കാര്‍ അപകടത്തിലാണ് ഡയാന കൊല്ലപ്പെട്ടത് .