20 ദിവസത്തിനിടെ 64 മരണം; ആഗ്രയിലെ ഗ്രാമങ്ങളില്‍ കോവിഡ് പിടിമുറുക്കുന്നു
ആഗ്രയിലെ രണ്ട് ഗ്രാമങ്ങളിലായി 64 പേരാണ് കഴിഞ്ഞ 20 ദിവസത്തിനിടെ കോവിഡ് ബാധിച്ച്‌ മരിച്ചത്. ചികിത്സ സൗകര്യങ്ങളുടെ അപര്യാപ്തതയും ജനങ്ങള്‍ക്ക് കോവിഡിനെ കുറിച്ച്‌ അവബോധമില്ലാത്തതും ഇവിടെ വലിയ പ്രതിസന്ധിയാണ് സൃഷ്ടിക്കുന്നത്.ആഗ്രയില്‍ നിന്ന് 12 കിലോ മീറ്റര്‍ അകലെയുള്ള ബാമരുളി കാത്ര ഗ്രാമത്തില്‍ 50 പേരാണ് കോവിഡ് രോഗലക്ഷണങ്ങളോടെ മരിച്ചത്. പലര്‍ക്കും ശ്വസിക്കാന്‍ ബുദ്ധിമുട്ട് അനുഭവപ്പെട്ടിരുന്നു. ആശുപത്രിക്കുള്ള യാത്ര മധ്യയേയാണ് പല ആളുകള്‍ക്കും ജീവന്‍ നഷ്ടമായത്. കോവിഡ് ലക്ഷണങ്ങളോടെ കൂടുതല്‍ പേര്‍ മരിച്ചതിനെ തുടര്‍ന്ന് കഴിഞ്ഞ ദിവസം ആരോഗ്യവകുപ്പ് ഇവിടെ പരിശോധന നടത്തി. പക്ഷേ 46 പേര്‍ മാത്രമാണ് പരിശോധനക്കെത്തിയത്. ഇതില്‍ നാല് പേര്‍ക്ക് രോഗം സ്ഥിരീകരിക്കുകയും ചെയ്തു. ഏകദേശം 40,000ത്തോളമാണ് ഗ്രാമത്തിലെ ജനസംഖ്യ. തെരഞ്ഞെടുപ്പിന് ശേഷമാണ് ഗ്രാമത്തില്‍ കോവിഡ് വ്യാപനം തുടങ്ങിയതെന്നും റിപ്പോര്‍ട്ടുണ്ട്.ആഗ്രയില്‍ നിന്ന് 40 കിലോ മീറ്റര്‍ അകലെയുള്ള എമാഡപൂര്‍ ഗ്രാമത്തിലും സ്ഥിതി വിഭിന്നമല്ല. ഇവിടെ 14 പേരാണ് പനിയും കോവിഡിെന്‍റ മറ്റ് ലക്ഷണങ്ങളുമായി മരിച്ചത്. 100 പേരെ ടെസ്റ്റ് ചെയ്തതില്‍ 27 പേര്‍ക്ക് രോഗം സ്ഥിരീകരിച്ചു. കൂടുതല്‍ ആളുകള്‍ രോഗബാധിതരായതോടെ സമീപത്തെ സ്കൂള്‍ ഐസോലേഷന്‍ സെന്‍ററാക്കി മാറ്റി. പക്ഷേ അടിസ്ഥാന സൗകര്യങ്ങള്‍ പോലും ഇവിടെയില്ല. രോഗികള്‍ക്ക് ശ്വാസതടസം അനുഭവപ്പെട്ടാല്‍ ഓക്സിജന്‍ നല്‍കുന്ന സംവിധാനവും ഒരുക്കിയിട്ടില്ല. അതേസമയം, ഗ്രാമത്തിലുള്ളവര്‍ കോവിഡ് പരിശോധനക്ക് മുന്നോട്ട് വരാത്തത് വലിയ പ്രതിസന്ധിയാവുന്നുണ്ടെന്ന് ആരോഗ്യപ്രവര്‍ത്തകര്‍ ചൂണ്ടിക്കാട്ടുന്നു.