ദൃശ്യം 2 വിനു ശേഷം മോഹൻലാൽ ജീത്തു ജോസഫ് വീണ്ടും ഒന്നിക്കുന്നു

ദൃശ്യം ടൂവിന് ശേഷം ജീത്തു ജോസഫിന്റെ സംവിധാനത്തിൽ മോഹൻലാൽ ചിത്രം. സിനിമാ ചിത്രീകരണത്തിന് സർക്കാർ അനുമതി നൽകിയാൽ ഉടൻ സിനിമയുടെ ഷൂട്ടിംഗ് തുടങ്ങും. കോവിഡ് നിയന്ത്രണങ്ങളിൽ അയവ്‌ വന്നാലുടൻ പൃഥ്വിരാജ് സംവിധാനം ചെയ്യുന്ന ബ്രോ ഡാഡിയിൽ മോഹൻലാൽ അഭിനയിക്കുമെന്നായിരുന്നു കരുതിയിരുന്നത്. എന്നാൽ ജീത്തു ജോസഫ് സംവിധാനം ചെയ്യുന്ന സിനിമയുടെ ചിത്രീകരണത്തിന് ശേഷമായിരിക്കും ബ്രോഡാഡിയുടെ ചിത്രീകരണം ആരംഭിക്കുന്നത്.

കോവിഡ് പ്രോട്ടോക്കോൾ അനുസരിച്ചായിരിക്കും സിനിമയുടെ ചിത്രീകരണം. ഒരു മിസ്റ്ററി ത്രില്ലർ ചിത്രമാണ് ഒരുക്കുന്നത്. സിനിമ ഒടിടിയ്ക്ക് വേണ്ടിയാണോ എന്നതിനെക്കുറിച്ചുള്ള തീരുമാനങ്ങൾ ഒന്നുമായിട്ടില്ല. എനിക്കതിനെക്കുറിച്ച് അറിവുമില്ല. ആന്റണി പെരുമ്പാവൂരാണ് സിനിമ നിർമ്മിക്കുന്നതെന്നും ജീത്തു ജോസഫ് ദ ക്യുവിനോട് പറഞ്ഞു.ജീത്തു ജോസഫ് മോഹൻലാൽ കൂട്ടുകെട്ടിൽ ഒരുങ്ങുന്ന ബിഗ് ബഡ്ജറ്റ് ചിത്രം റാമിന്റെ ചിത്രീകരണം കോവിഡ് വ്യാപനത്തെ തുടർന്ന് താത്കാലികമായി നിർത്തിവെച്ചിരിക്കുകയാണ്. സിനിമയുടെ ലണ്ടൻ ഷെഡ്യൂൾ പൂർത്തിയായിട്ടില്ല. സാഹചര്യങ്ങൾ അനുകൂലമാകുമ്പോൾ സിനിമയുടെ ഷൂട്ടിങ് പുനരാരംഭിക്കുമെന്നും ജീത്തു ജോസഫ് പറഞ്ഞു. പൃഥ്വിരാജ് സംവിധാനം ചെയ്യുന്ന ബ്രോ ഡാഡിക്ക് ശേഷമായിരിക്കും മോഹൻലാലിന്റെ ആദ്യ സംവിധാന സംരംഭമായ ബറോസിന്റെ അടുത്ത ഷെഡ്യൂൾ ആരംഭിക്കുന്നത്. കോവിഡ് വ്യാപനത്തെ തുടർന്ന് സിനിമയുടെ ഷൂട്ടിങ് താത്കാലികമായി നിർത്തിവെച്ചിരിക്കുകയാണ്.ജീത്തു ജോസഫ് മോഹൻലാൽ കൂട്ടുകെട്ടിൽ ഒരുങ്ങിയ ദൃശ്യവും ദൃശ്യം ടൂവും മികച്ച വിജയമായിരുന്നു നേടിയിരുന്നത്. ദൃശ്യം തീയറ്ററിൽ റിലീസ് ചെയ്തപ്പോൾ ആമസോൺ പ്രൈമിലായിലായിരുന്നു ദൃശ്യം 2 റിലീസ് ചെയ്തത്. പ്രമുഖ സിനിമ വെബ്സൈറ്റായ ഐഎംഡിബിയിൽ ലോകത്തിലെ തന്നെ ‘മോസ്റ്റ് പോപ്പുലർ’ സിനിമകളുടെ പട്ടികയിൽ ദൃശ്യം 2 ഇടം നേടിയിരുന്നു. സിനിമ ഹിന്ദിയിലും തെലുങ്കിലും റീമേക്ക് ചെയ്യുന്നുണ്ട് .ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ദൃശ്യം 2 നിർമ്മിച്ചത്.