പ്രശസ്ത യൂട്യൂബ് വ്ളോഗര്‍മാര്‍ ബുള്‍ ജെറ്റ് സഹോദരങ്ങള്‍ അറസ്റ്റില്‍
കണ്ണൂര്‍ ആര് ടി ഒയില്‍ എത്തി സംഘര്‍ഷം ഉണ്ടാക്കിയതിനും സര്‍ക്കാര്‍ ഉദ്യോഗസ്ഥരുടെ കൃത്യനിര്‍വ്വഹണത്തിന് തടസ്സം നിന്നതിനും കൊവിഡ് മാനദണ്ഡങ്ങള്‍ ലംഘിച്ച്‌ ജനക്കൂട്ടം ഉണ്ടാക്കിയതിനുമാണ് പ്രശസ്ത യൂ ട്യൂബ് വ്ളോഗര്‍മാരായ ഈ ബുള്‍ ജെറ്റിനെ പൊലീസ് അറസ്റ്റ് ചെയ്തത്.രാജ്യം മുഴുവന്‍ യാത്ര ചെയ്യുന്ന ഇ ബുള്‍ ജെറ്റ് വ്ലോഗര്‍മാര്‍ എബിന്റെയും ലിബിന്റെയും വാഹനം കഴിഞ്ഞ ദിവസം കണ്ണൂര്‍ ആര് ടി ഒ പിടിച്ചെടുത്തിരുന്നു. വാഹനത്തില്‍ മറ്റുള്ളവര്‍ക്ക് അപകടകരമായ രീതിയില്‍ മോഡിഫിക്കേഷന്‍ വരുത്തി എന്ന കാരണത്താലാണ് ആര് ടി ഒ ഇവരുടെ വാന്‍ പിടിച്ചെടുത്തത്. തുടര്‍ന്ന് വാഹനം തിരിച്ചു കിട്ടണമെങ്കില്‍ 6400 രൂപയും നിയമവിരുദ്ധ രൂപമാറ്റത്തിന്റെ പിഴയായി 42,000 രൂപയും അടയ്ക്കണമെന്ന് ആര് ടി ഒ ആവശ്യപ്പെട്ടിരുന്നു.എന്നാല്‍ ആര് ടി ഒ യുടെ ഓഫീസില്‍ ഹാജരാകും മുന്‍പ് ഇവര്‍ ചെയ്ത ഫേസ്ബുക് ലൈവ് കണ്ട് ഇവരുടെ ആരാധകര്‍ ഓഫീസിനു മുന്‍പില്‍ കോവിഡ് മാനദണ്ഡങ്ങള്‍ പാലിക്കാതെ തടിച്ചു കൂടിയിരുന്നു. ആര് ടി ഒ ഓഫീസിലെ ഉദ്യോഗസ്ഥന്മാരുമായി ഇവര്‍ കയര്‍ത്തു സംസാരിച്ചിരുന്നു. തുടര്‍ന്നാണ് ഇവര്‍ക്കെതിരെ കേസെടുക്കാന്‍ പോലീസ് തീരുമാനിച്ചത്.