കേരള ബ്ലാസ്റ്റേഴ്സ് കുറിച്ചത് 13 റിക്കാര്‍ഡുകള്‍
ലീഗ് റൗണ്ടില്‍ മാത്രമായാണ് ഇത്രയും റിക്കാര്‍ഡ് മഞ്ഞപ്പട സ്വന്തമാക്കിയത്. ബ്ലാസ്റ്റേഴ്സ് ചരിത്രത്തില്‍ ഒരു സീസണില്‍ ഇത്രയും റിക്കാര്‍ഡ് കുറിക്കുന്നതും ചരിത്രസംഭവം.
01: വിജയ ശതമാനത്തില്‍ ബ്ലാസ്റ്റേഴ്സിന്‍റെ മുഖ്യപരിശീലകന്‍ ഇവാന്‍ വുകോമനോവിച്ച്‌ റിക്കാര്‍ഡ് കുറിച്ചു. ഐഎസ്‌എല്ലില്‍ വുകോമനോവിച്ചിന്‍റെ വിജയശതമാനം 45 ആണ്. മുന്‍ പരിശീലകന്‍ സ്റ്റീവ് കോപ്പെലിന്‍റെ പേരിലായിരുന്ന (41.18) റിക്കാര്‍ഡാണ് തിരുത്തിയത്.
02: ഒരു സീസണില്‍ ബ്ലാസ്റ്റേഴ്സിനായി ഏറ്റവും കൂടുതല്‍ ജയം നല്‍കിയ പരിശീലകന്‍ എന്ന റിക്കാര്‍ഡും (9) വുകോമനോവിച്ച്‌ സ്വന്തമാക്കി. സ്റ്റീവ് കോപ്പലിന്‍റെ (6) പേരിലെ റിക്കാര്‍ഡാണ് പഴങ്കഥയായത്.
03: കേരള ബ്ലാസ്റ്റേഴ്സിനായി ചരിത്രത്തില്‍ ഏറ്റവും കൂടുതല്‍ അസിസ്റ്റ് (7) എന്ന റിക്കാര്‍ഡ് ഉറുഗ്വെന്‍ താരമായ അഡ്രിയാന്‍ ലൂണ സ്വന്തമാക്കി. ഹൊസുവിന്‍റെ പേരിലും ജെസെല്‍ കര്‍ണെയ്റോയുടെ പേരിലുമുണ്ടായിരുന്ന (6) റിക്കാര്‍ഡാണ് ലൂണ തിരുത്തിയത്.
04: ഒരു സീസണില്‍ ഏറ്റവും കൂടുതല്‍ അസിസ്റ്റ് എന്ന റിക്കാര്‍ഡും അഡ്രിയാന്‍ ലൂണ കുറിച്ചു. അഞ്ച് അസിസ്റ്റ് നടത്തിയ കര്‍ണെയ്റൊയുടെ പേരിലുണ്ടായിരുന്ന റിക്കാര്‍ഡ് ഏഴ് ആക്കിയാണ് ലൂണ തിരുത്തിയത്, പ്ലേ ഓഫ് ശേഷിക്കുന്നുമുണ്ട്.
05: ഒരു സീസണില്‍ ഏറ്റവും കൂടുതല്‍ ക്ലീന്‍ ഷീറ്റ് നേടിയ കേരള ബ്ലാസ്റ്റേഴ്സ് ഗോളി എന്ന റിക്കാര്‍ഡ് പ്രഭ്സുഖന്‍ സിംഗ് ഗില്‍ (17 മത്സരങ്ങളില്‍നിന്ന് ആറ് ക്ലീന്‍ ഷീറ്റ്) സ്വന്തമാക്കി. പോള്‍ സ്റ്റീഫന്‍ റെഹ്യൂബ്കയുടെ (5) റിക്കാര്‍ഡ് പഴങ്കഥയായി.
06: ഈ സീസണില്‍ കേരള ബ്ലാസ്റ്റേഴ്സ് ലീഗ് റൗണ്ടില്‍ ആകെ ഏഴ് മത്സരങ്ങളില്‍ ഗോള്‍ വഴങ്ങിയില്ല. ഏറ്റവും കൂടുതല്‍ ക്ലീന്‍ ഷീറ്റ് ബ്ലാസ്റ്റേഴ്സ് നേടിയ സീസണ്‍ ആണിത്. 2021-22 സീസണില്‍ ക്ലീന്‍ ഷീറ്റില്‍ ഒന്നാം സ്ഥാനത്തുള്ളതും ബ്ലാസ്റ്റേഴ്സ് ആണ്.
07: ഒരു സീസണില്‍ ഏറ്റവും കൂടുതല്‍ ഗോള്‍ എന്ന റിക്കാര്‍ഡ്. 20 മത്സരങ്ങളില്‍ 34 ഗോള്‍ മഞ്ഞപ്പട ഇതുവരെ സ്വന്തമാക്കി. പ്ലേ ഓഫ് മത്സരങ്ങള്‍ ബാക്കിയുണ്ട് എന്നതും ശ്രദ്ധേയം. 2019-20 സീസണില്‍ 18 മത്സരങ്ങളില്‍നിന്ന് 29 ഗോള്‍ നേടിയതായിരുന്നു ഇതുവരെയുണ്ടായിരുന്ന ഗോള്‍ റിക്കാര്‍ഡ്.
08: ഏറ്റവും കൂടുതല്‍ പോയിന്‍റ് എന്ന സീസണ്‍ റിക്കാര്‍ഡും ഇത്തവണ കുറിക്കപ്പെട്ടു. 20 മത്സരങ്ങളില്‍നിന്ന് 34 പോയിന്‍റ് ഈ സീസണില്‍ ബ്ലാസ്റ്റേഴ്സ് സ്വന്തമാക്കി. 2017-18 സീസണില്‍ ആറ് ജയവും ഏഴ് സമനിലയും നേടി 25 പോയിന്‍റ് കുറിച്ചതായിരുന്നു ഇതുവരെയുള്ള റിക്കാര്‍ഡ്.
09: സീസണില്‍ ബ്ലാസ്റ്റേഴ്സിനായി 10 കളിക്കാര്‍ ഗോള്‍ നേടി. ഒരു സീസണില്‍ ബ്ലാസ്റ്റേഴ്സിനായി ഇത്രയും കളിക്കാര്‍ ഗോള്‍ നേടുന്നത് ഇതാദ്യം. എട്ട് ഗോള്‍ വീതം ആല്‍വാരോ വാസ്ക്വെസും ജോര്‍ജ് പെരേര ഡിയസും സ്വന്തമാക്കി. സഹല്‍ സമദ്, ലൂണ എന്നിവര്‍ അഞ്ച് വീതവും വിന്‍സി ബാരെറ്റൊ രണ്ടു ഗോളും നേടി. ഖബ്ര, ഏണെസ് സിപ്പോവിച്ച്‌, നിഷു കുമാര്‍, കെ. പ്രശാന്ത്, ജീക്സണ്‍ എന്നിവര്‍ ഓരോ ഗോള്‍ സ്വന്തമാക്കി.
10: ലീഗ് റൗണ്ടില്‍ കേരള ബ്ലാസ്റ്റേഴ്സ് നേടുന്ന ഏറ്റവും കൂടുതല്‍ ജയത്തിനും 2021-22 സാക്ഷ്യം വഹിച്ചു. 20 മത്സരങ്ങളില്‍ 9 ജയം. 2016ല് ഫൈനലില്‍ പ്രവേശിച്ചപ്പോഴും 2017-18 സീസണില്‍ ആറാം സ്ഥാനത്തായിരുന്നപ്പോഴും ആറ് ജയം വീതം നേടിയതായിരുന്നു ഇതിനു മുന്പുള്ള റിക്കാര്‍ഡ്.
11: ഒരു സീസണിലെ ലീഗ് റൗണ്ടില്‍ ഏറ്റവും കുറവ് തോല്‍വി എന്ന നേട്ടവും ബ്ലാസ്റ്റേഴ്സ് കുറിച്ചു. ഈ സീസണില്‍ നാല് തോല്‍വി മാത്രമാണ് ബ്ലാസ്റ്റേഴ്സ് വഴങ്ങിയത്. 2016ല് ഫൈനലില്‍ കടന്ന സീസണില്‍ 14 മത്സരത്തില്‍ നാല് തോല്‍വിയേ വഴങ്ങിയിരുന്നുള്ളൂ.
12: ചരിത്രത്തില്‍ ആദ്യമായി ബ്ലാസ്റ്റേഴ്സ് പോസിറ്റീവ് ഗോള്‍ വ്യത്യാസത്തില്‍ ലീഗ് റൗണ്ട് പൂര്‍ത്തിയാക്കി, +10 ആണ് ബ്ലാസ്റ്റേഴ്സിന്‍റെ ഈ സീസണിലെ ലീഗ് റൗണ്ട് ഗോള്‍ വ്യത്യാസം. 2014ലും 2016ലും (-2) ഫൈനല്‍വരെ എത്തിയപ്പോഴും നെഗറ്റീവ് ആയിരുന്നു.
13: ഐഎസ്‌എല്‍ ചരിത്രത്തില്‍ ഒരു മത്സരത്തില്‍ ഏറ്റവും കൂടുതല്‍ ഗോള്‍ (എട്ട് ഗോള്‍) പിറന്ന സമനില എന്ന റിക്കാര്‍ഡിനൊപ്പം ബ്ലാസ്റ്റേഴ്സ് വീണ്ടും. എഫ്സി ഗോവയ്ക്കെതിരായ 4-4 സമനിലയിലൂടെയാണ് ഈ നേട്ടത്തില്‍ ബ്ലാസ്റ്റേഴ്സ് വീണ്ടും എത്തിയത്. 2020ല് ഒഡീഷ എഫ്സിക്ക് എതിരേയും ബ്ലാസ്റ്റേഴ്സ് 4-4 സമനില നേടിയിരുന്നു.