കേന്ദ്രസര്‍ക്കാറിന്റെ കടം 155 ലക്ഷം കോടി കടന്നു
ഡോ. വി. ശിവദാസന്‍ എം.പി ഉന്നയിച്ച ചോദ്യത്തിന് നല്‍കിയ മറുപടിയിലാണ് ഇക്കാര്യം അറിയിച്ചത്. 2017-18ല്‍ 82.9 ലക്ഷം കോടി രൂപ ആയിരുന്നത് 2022-23ല്‍ 155.8 ലക്ഷം കോടി രൂപ ആയി ഉയരുകയായിരുന്നു. 2017-18ല്‍ മൊത്തം ജി.ഡി.പിയുടെ 48.5 ശതമാനമായിരുന്നു കടം. എന്നാല്‍, 2022-23ല്‍ ഇത് 57.3 ശതമാനമായി ഉയര്‍ന്നു.2021-22ല്‍ 138.9 ലക്ഷം കോടി രൂപ ആയിരുന്ന കടം ഒരു വര്‍ഷംകൊണ്ട് 16.9 ലക്ഷം കോടി വര്‍ധിച്ചാണ് 155.8 ലക്ഷം കോടി ആയത്. വിദേശ -ആഭ്യന്തര കടങ്ങളുടെ കണക്ക് പരിശോധിച്ചാല്‍ രണ്ടും ഇരട്ടിയോളമായി വര്‍ധിച്ചു. കടത്തിന് പലിശ കൊടുക്കാനും വന്‍ തുക മാറ്റിവെക്കേണ്ടിവരുന്നുണ്ട്. 2022-23ല്‍ കടത്തിന്റെ പലിശ കൊടുക്കാന്‍ വേണ്ടത് 9.4 ലക്ഷം കോടി രൂപയാണ്.മൊത്തം 45 ലക്ഷം കോടിയുടെ ഈ വര്‍ഷത്തെ കേന്ദ്രബജറ്റില്‍ 27 ലക്ഷം കോടിയും കടമാണ്. അതില്‍നിന്നുമാണ് 9.4 ലക്ഷം കോടി രൂപ പലിശ കൊടുക്കാന്‍ മാത്രം നീക്കി വെക്കേണ്ടിവരുന്നത്. കോവിഡ് മൂലമാണ് 2020-21ല്‍ കടം കൂടിയത് എന്നാണ് സര്‍ക്കാര്‍ വ്യക്തമാക്കിയതെന്നും എന്നാല്‍, കോവിഡിന് മുന്നേതന്നെ കടം ഉയര്‍ന്നുതുടങ്ങി എന്ന് കണക്കുകളില്‍നിന്ന് വ്യക്തമാണെന്നും വി. ശിവദാസന്‍ പറഞ്ഞു. പ്രധാനമന്ത്രിയുടെയും പ്രസിഡന്റിന്റെയും വിമാനത്തിന്റെ വില സംബന്ധിച്ച്‌ വിവരവും വെളിപ്പെടുത്താനാകില്ലെന്നാണ് കേന്ദ്രം നല്‍കിയ മറുപടി.