ഇന്നലെ നുമാന്‍സിയയെ എതിരില്ലാത്ത മൂന്ന് ഗോളുകള്‍ക്ക് തോല്‍പ്പിച്ചതോടെ സെഗുണ്ട ഡിവിഷനിലെ രണ്ടാം സ്ഥാനക്കാരായ ഹുയെസ്ക ലാലിഗയിലേക്ക് പ്രൊമോഷന്‍ ഉറപ്പിച്ചു. കഴിഞ്ഞ സീസണിലായിരുന്നു ഹുയെസ്ക ലാലിഗയില്‍ നിന്ന് പുറത്തായത്.ഒരു സീസണ്‍ കൊണ്ട് തന്നെ ലീഗിലേക്ക് മടങ്ങി വരാന്‍ ആയി എന്നത് ക്ലബിന് വലിയ ആത്മവിശ്വാസം നല്‍കും. 41 മത്സരങ്ങളില്‍ നിന്ന് 67 പോയന്റുമായി ലീഗില്‍ രണ്ടാമത് നില്‍ക്കുകയാണ് ഹുയെസ്ക. ഇനി ആകെ ഒരു റൗണ്ട് മത്സരം മാത്രമെ സെഗുണ്ട ഡിവിഷനില്‍ ബാക്കിയുള്ളൂ. 69 പോയന്റുമായി ഒന്നാമത് നില്‍ക്കുന്ന കാദിസ് നേരത്തെ പ്രൊമോഷന്‍ ഉറപ്പിച്ചിരുന്നു. ഇനി പ്ലേ ഓഫിലൂടെ ആണ് മൂന്നാമത്തെ പ്രൊമോഷന്‍ ആര്‍ക്കെന്ന് തീരുമാനിക്കുക. അവസാന റൗണ്ട് കൂടെ കഴിഞ്ഞാലെ പ്ലേ ഓഫില്‍ ആരൊക്കെ കളിക്കും എന്ന് ഉറപ്പാവുകയുള്ളൂ.