ബംഗളൂരു : ബംഗളൂരുവിലെ കണ്ടന്‍റ് ക്രിയേറ്ററും മേക്കപ്പ് ആര്‍ട്ടിസ്റ്റുമായ ഹിതേഷ ചന്ദ്രാനെയാണ് സൊമാറ്റോ ഡെലിവറി ബോയി മര്‍ദിച്ചുച്ചെന്ന പരാതിയുമായി രംഗത്തെത്തിയത്.മൂക്കില്‍ നിന്നും രക്തം ഒഴുകുന്ന രീതിയിലുള്ള വീഡിയോ ഇന്‍സ്റ്റാഗ്രാമില്‍ പോസ്റ്റ് ചെയ്ത ഹിതേഷ, തന്റെ ഓര്‍ഡര്‍ ഡെലിവറി ചെയ്യാന്‍ വൈകിയതിനെ തുടര്‍ന്നുണ്ടായ തര്‍ക്കമാണ് മര്‍ദനത്തില്‍ കലാശിച്ചതെന്ന് പറയുന്നു . ഡെലിവറി എക്സിക്യൂട്ടീവ് വീട്ടില്‍ അതിക്രമിച്ച്‌ കയറി തന്നെ അധിക്ഷേപിച്ചുവെന്നും അവര്‍ ആരോപിക്കുന്നു.മാര്‍ച്ച്‌ 9 ന് വൈകുന്നേരം 3.30 നാണ് ഭക്ഷണത്തിനായി ഓര്‍ഡര്‍ നല്‍കിയത് . 4.30 ഓടെ ഡെലിവറി ചെയ്യേണ്ടിയിരുന്ന ഭക്ഷണം കൃത്യസമയത്ത് ലഭിക്കാത്തതിനാല്‍ സൊമാറ്റോയുടെ കസ്റ്റമര്‍ കെയറുമായി ബന്ധപ്പെട്ട് സംസാരിച്ചിരുന്നു .ഓര്‍ഡര്‍ ക്യാന്‍സല്‍ ചെയ്യാനോ അതല്ലെങ്കില്‍ ഡെലിവറി തുക തിരിച്ചുനല്‍കാനോ ആവശ്യപ്പെട്ടു. ഇതിനിടയില്‍ ഭക്ഷണവുമായി കാമരാജ് എന്ന ഡെലിവറി എക്സിക്യൂട്ടീവ് എത്തി . വൈകിയതിനാല്‍ ഓര്‍ഡര്‍ വേണ്ടെന്നും കസ്റ്റമര്‍ കെയറുമായി സംസാരിക്കുകയാണെന്നും അറിയിച്ചെങ്കിലും തിരിച്ചുപോകാതെ അയാള്‍ തന്നെ അധിക്ഷേപിക്കുകയും , മര്‍ദിക്കുകയുമായിരുന്നുവെന്ന് ഹിതേഷ പറഞ്ഞു.